Кыргыз Республикасынын Улуттук кургак учукка каршы программасы өпкө ооруларын аныктоо системасын заманбапташтырууда маанилүү кадам жасады. Эл аралык жана жергиликтүү өнөктөштөрдүн колдоосу менен мекеме жасалма интеллект системасы менен жабдылган эң алдыңкы өтө жеңил көчмө рентген аппаратын алды.
Жабдуулар «Ден соолук нуру» коомдук фонду тарабынан Stop TB Partnership долбоорунун жана АКШнын Мамлекеттик департаментинин каржылык колдоосу менен өткөрүлүп берилди.
УФБ жана «Ден соолук нуру» КФ директорлорунун, ошондой эле эки тараптын адистеринин катышуусунда жумушчу жолугушуу болуп өттү. Натыйжалуу диалогдун жүрүшүндө командалар жабдууларды орнотуунун этаптарын, медициналык кызматкерлерди окутуу графиктерин жана өлкөнүн аймактарында көчмө комплекстерди ишке киргизүү стратегияларын кеңири талкуулашты. Негизги максат — Кыргызстандын эң алыскы жана жетүүгө кыйын аймактарында да жогорку тактыктагы диагностиканы жеткиликтүү кылуу.
Кандай жабдуулар алынды? Өткөрүлүп берилген комплекс кургак учукту тез жана коопсуз скринингден өткөрүү үчүн инновациялык чечим болуп саналат:
Delft Light X-ray Kit өтө жеңил рентген комплекси: Өзүнө көчмө рентген жабдуусун, радиациялык коопсуздукту катуу көзөмөлдөө үчүн дозиметрди, ошондой эле кесипкөй орнотуу кызматтарын, кызматкерлерди окутууну жана үч жылдык кепилдикти камтыйт.
Жасалма интеллекттин негизиндеги CAD4TB программалык камсыздоосу: Программага мөөнөтсүз лицензияны, сервердик жабдууну (CAD4TB Box), аны интеграциялоону, жөндөөнү, дарыгерлерди окутууну жана 3 жылдык кеңейтилген кепилдикти камтыйт. CAD4TB системасы рентген сүрөттөрүн автоматтык түрдө анализдеп, саналуу секунддардын ичинде кургак учуктун белгилерин аныктап, дарыгерлерге так диагноз коюуга жардам берет.
Жасалма интеллекти бар көчмө санариптик рентген аппараттарын киргизүү диагноз коюу убактысын кыйла кыскартууга, дарыгерлердин түйшүгүн азайтууга жана эң негизгиси - бейтаптарды дарылоону өз убагында баштоого, алардын өмүрүн сактап калууга жана инфекциянын жайылышын алдын алууга мүмкүндүк берет.
КР Улуттук кургак учукка каршы программасы Кыргыз Республикасынын калкынын саламаттыгына кошкон баа жеткис салымы үчүн «Ден соолук нуру» КФга, Stop TB Partnership долбооруна жана АКШнын Мамлекеттик департаментине терең ыраазычылык билдирет!
